Шымкент қаласында экологиялық туризмді дамытуға бағытталған жаңа туристік нысан – «Өмір Шымкент» туристік кешенінің алғашқы кезеңі іске қосылды.
Бадам су қоймасының көркем жағалауында орналасқан кешен 74 гектар аумақты қамтиды. Жоба табиғи ландшафтпен үйлесімділікті сақтай отырып, заманауи жайлылық пен демалыстың жаңа мүмкіндіктерін ұсынады.
Қазіргі таңда қонақтарға жайлы демалысқа арналған тұрғын үйлер мен болашақта іске қосылатын капсулалық үйлер қолжетімді. Кешеннің толық іске қосылуы аясында мұнда модульдік үйлер, ASPAN мейрамханасы, дәстүрлі Сихкия сауна-асханасы, спорттық нысандар, амфитеатр, атпен серуендеу аймақтары және жергілікті шарап өндіруге арналған арнайы орындар қарастырылған.
«Өмір Шымкент» – табиғат аясында демалып қана қоймай, өңірдің туристік әлеуетімен танысуға мүмкіндік беретін жаңа экотуризм бағыты.
Жобаның іске қосылуы Шымкенттің туристік инфрақұрылымын дамытуға, қала маңындағы табиғи аумақтарды тиімді пайдалануға және өңірдің экотуризм бағытындағы мүмкіндіктерін кеңейтуге серпін береді.
Шымкент – жаңа бағыттар мен жаңа әсерлер қаласы!
